Sasikala-i akhangba Centre-i agizük

Chennai, January 10 (Agencies) : AIADMK general secretary Sasikala Natarajan-i Centre dang Pongal benjung anogo ‘compulsory holiday’ kümdakjang ta tezüluba ka agütsüba sülen Narendra Modi-i aniba sorkari Mongulbarnü ibaji agizükogo.
Centre-i Pongal anogoji ‘Restricted holiday’ ta sangdonga liasü saka Sasikala-i ibaji ‘compulsory’ kümdaktsütsü ta shia liasü.
“Tamil Nadu nung central government employees-i kümshia Pongal benjungji ‘compulsory holiday’ ka ama mungyonga aru saka Centre-i ‘restricted holiday’ ta melentsüba atema onok kanga aoksa” ta Sasikala-i züluba shidi nung shia lir.
Pongal ya sobaliba benjung ka lir aser mapang talangka iba benjung ya kanga tongtpang süa munga arur. Centre sorkar atema mapa inyakertem pei kibong den iba benjung mungdaktsütsübaji Centre indang teinyaktsü lir, ta laisa ashi.
Takümbo Pongal benjungji January 14, Honibarnü amshir, saka Centre-i iba benjung akhümtsübutsüla aser central departments ajak nem sodi agütsütsüla, ta Sasikala-isa metetdaktsü.
“Centre-i Tamil nunger temeten aser taginübatem metettsüla aser Pongal ya compulsory holiday ka ama agütsütsüla” ta laisa shidi nung lemsatep.
Asür taoba Chief Minister Jayalalithaa-i inyakba ajanga Tamil nunger temetentem aika kümzüka ayu aser tang Tamil Nadu-i Centre dang nungi telangzüba tajung imlaa atar, ta Sasikala-isa metetdaktsü.
Tanü Tamil Nadu Chief Minister, O Panneerselvam-ia Prime Minister dang Compulsory Holidays nung Pongal densemdaktsütsü atema mepishia shidi ka züluogo.