Sasikala jail nungi adokogo saka media den jembitsü memelar

Chennai, October 06 (Agencies): AIADMK interim general secretary, VK Sasikala-i la dak mapet rongsen bendenba ken o nung la aitsüba sülen taküm February ita nungi la tepoukdaki yoka liasü, aser la tepoukdak ita 8 amongba sülen la anogo pongu atema bail nung chiokogo.
Kaket dak sendakba maparen matemba ajanga taoba hopta jail ketdangsertemi la mechiok, ajisüaka tanü la nem telatetba kar agüja la bail nung chiokogo.
Bengaluru Central Prison ketdangsertemi ashiba agi, “La parole nung alidang, Sasikala-i la kinüngbu amongba hospital dang semdangtsü akok, aser ibaji lai agutsüba temepishiba shidi nung shia lir. Sasikala-i la semdangertem ajurutsü makok mesüra lokti senden aser party dak sendakba mapatem inyaktsü makok, mesüra osangbenertem den jembitsü makok.”
Sasikala kinüngbu arishi küm 74, M Natarajan tawa Chennai nung amenoka aliba hospital kati anir aoba sülen Liver Intensive Care Unit nung yaridar. Pa temesen dak sendakba tashidak balala agi shiranger iba den külemi tepokpok aser tezüngjang nung timtem lir. Bodhbarnü pa temesen aser tezüngjang melena liasü.
La chioktsü, ta teimla nung lar kinünger, TTV Dhinakaran tanü Bengaluru Central prison-i arua liasü.
Sasikala ya taoba mapang Tamil Nadu Chief Minister, asür J Jayalalithaa den kanga atongsema inyaker ka liasü aser küm aika tena Poes Garden home nung külemi lia aru.
Yaküm December ita nung Jayalalithaa asüba sülen la AIADMK general secretary akum, aser lai Chief Minister akumtsü meranga liasü.
Kasa mapang nungjisa, 1990s mapang nung lai la dak mapet rongsen jenti rizüngba ken o nung Supreme Court-i la aitsüba sülen la tepoukdak ayutsü obendang agütsü.