SASRD Medziphema nung Freshers Meet agi

Dimapur, September 2 (TYO) : School of Agricultural Sciences and Rural Development (SASRD) 22 buba annual fresher’s social meet Hokolbarnü agiogo.
Iba sentong ya SASRD auditorium Medziphema nung agi tongti tesemdangerji Housing Parliamentary secretary, Er Levi Rengma liasü.
Sentong nung Er Levi-i tasenpurtem dang iba reju nung azüngtsü menden anguba atema tenüngsang agütsü.
“Taruba küm pezü tashi nenok iba reju zünga aotsü tang nenoki tetsüng ajemokogo. Nenok yagi zünga aodang shisatsü aika angazüktsü aser aika ajangshitsü imlar” ta paisa ashi.
Shisaliok reju indang inyakyim nung Fresher’s Day ya kanga dang tongtipang sentong ka lir. Iba sentong ajanga kaketshirtem shisashir telok nung anioker. Iba mapang kaketshir tasentem shisaluyimer mongintem rongnung züngsemer, ta Er. Levi-isa ayongzük.
Paisa, tsürabur, guardian aser sponsor tem teti bilemtettsü kechiyong parnokiang senotsü, osettsüset aser shisatsü teyari agütsür, ta kaketshirtem ayongzük.
Iba sentong nung Prof. N.S. Jamir, Pro. Vice Chancellor Nagaland University, SASRD-ia o tatsüka jembi.
Sentong nung mendenji SASRD student union president, Kihika liasü, TBC Medziphema Pastor, Keviuchulie Mezhu-i temoatsü meshia sarasadem, Prof. R.C. Gupta, Dean NU, SASRD-i tesentepertem pela agizük aser SASRD evangelical union-i ken ka aten.
Maneni, Imnichetla Jamir (PG) aser Alemla Imchen (PG) nati Freshers’ tenüng nung o jembi, Lalngaizuali-i ken ka aten aser SASRD student union vice president, Zhoponu Chuzho-i anküp tepela o jembi.