SASU-i Southern Angami nung kaketshirtem dang sangdonger

Kohima, Luroi/August 23 (TYO): Kaketshirtem azüoktsü atema Southern Angami Students’ Union (SASU)-i Southern Angami jurisdiction nung aliba kaket rejutem nung azünger kaketshirtem dang temzüng ozüng nenshia metetdaktsüogo.
Taoba mapang office ketdangpurtemi renemba bangzüng maneni benshitsü aser shisaliok rejutem den nüburtem nema meteta lidaktsütsü atema maneni kaketshirtem atema renema aliba bangzüng/telatetbatem nenshia metetdaktsür, ta SASU President, Virato Naleo aser Action Committee züngsem, Mezivil Kiso nati sangdong ka nung metetdaktsü.
Southern Angami jurisdiction nung class agiba mapang nung class nung medeni kaketshirtem uniform nung nemzüa senzütsü memelar, ta parnoki metetdaktsü.
“Class agiba mapang nung kaketshir kar danga nemzüa senzüba putetra, class agiba mapang college/school temeket adener nija garitem anishiba pura union-i gariji pua ayutsü aser temerenshi agütsütsü,” ta sangdong nung shia lir.
Pei mekümdangba agi kaketshirtem anir senzüba gari tsükokra (mechanical timtem ajanga tsükokba dak alaka) mesüra timtem kar danga atalokra gari anisangji commercial atema gari amshitsü memelatsü, ta panroki metetdaktsü.
“Tim masüba mapatem inyakba, tesayurtem/lecturers/asst. professors/professors/ administrators mezüngmeshira mesüra amokmerenra ibajibo magizüktettsüü,” ta sangdong nung shia lir.
SASU-isa kaketshirtem dang Angami Students Union (ASU) parent unit-i latetba “students’ code” zünga benshitsü metetdaktsüogo.

You must be logged in to post a comment Login