Satan Memejanger – Mathi 13:24-30

“Tekümdang aser Mita aliba” (1 Peter 5:8).
Satan, pa mapang tatsüka dang lir ta meteta sayutsüngirenlen pai kanga aritepa mapa inyaker. Pai ajakleni aor aser alurubaji raksatsür. Pai mapa yimya balala ajanga sayutsüngiba mapaji raksatsütsü meranger. Khristan anema tiyazü tesayuba prokshir, temaitsü aser tesüngmangtsü sayatenya mapa inyaker. Kinü tamangertemi item mapa ajak metetnüa jangraa bushir aser parnok ashioktsür. Ejip nunger par Tsüngremer aini meyokba Tsüngrem ain tamangertem asoshi jungkai adokang ta sarasademang (Anitet 7:8-12).
Paul Efesa yimti nung ita asem amongdang inyakba mapa Tsüngremi agizüka tanela aika tekümtet kadaktsür. Iba sülen ayi adok. Shirnoki temulung meranga osangtajungji magizük parnoki osangtajung anema apuso. Iba jagi tamanger tasentemji aoksadaktsü. Pa ita asem amongba mapa nungi adokba süngjangji wazüka ayutsü atema Pauli Efesa yimti nung küm ana nütsüngtem den ali (T.M. 19:8-10).
Alu tulu aser mapa inyaker ishikadang liasü, tamanger tasen ishika jagi ita nung kenang semdangteta liasü. Iba jagi santem anizüka anir aotsü tsükchirtem nem mapang tajung lapoktsü. Mapa inyakertem mejanga alidang mesüra parnok maliba mapang tsükchirtemi sangremer tsük prok (Mt. 13:24-25). Mulungsentsü memerükertemi Tsüngremi merenshir. Kodang missionary mapang teyarirtem osang mezüng südaktsüdir, Khrista shiba tanela tekümtet asoshi azü tokshi pa nüksü ayimtsü. Mission tentetji Tsüngrem yimli yanglurtem asoshi ken atema ki akhüm süzükba dang lir. Tentet tuluba küma yanglutsübaji mezüngbuba onük masütsüla. Aji oda süra, asenoki asenok asoshi yimli yanglur asütsü. Tenyaba mapa nung tepela osang aluruba osang aser nüngdak aser alurutsü tayongzükba sarasademji lir. Saka Tsüngremi soloksora mapa koba agi tai tangatetba agütsüba mapatem O bendangtsü. Alu nung inyakertemi ochi shia inyaktsü aser tesayuba mapa terenlok asoshi sarasademang.
Temeimba Tsüngrem, Nai tenyaba mapa nung kwika noktaka lir parnoki Nai mulungba nung Na sentsüwangshidakja ochi shia inyaktsü tangatetba tanela agi inyaktsü yariang. Amen.