Satellite ajanga ozüng alema nakmati atuba mita reprangtsü

New Delhi, December 20 : Indian Space Research Organisation (ISRO) den yaritepa Centre-i space technology & satellite imagery ajanga linük nung ozüng alema nakmati atuba maparen mita reprangtsü telemtetba agiogo.
Iba ya ajanga state temi remote sensing technology amshia pei pei litsü mita reprangtsü aser anogo 15-30 shia osangtem agitettsü. Iba inyakyim ajanga ketdangsertemi nakmati atuba osang tejangja metetba dang masü saka ozüng alema inyakba mapa putettsü, ta osang ka ajanga metetdaktsü.
Maharashtra nungbo remote sensing technology ajanga ozüng alema nakmati atuba maparen mittsü tenzükogo aser parnoki tanga state tem yaritsü mulunga lir ta metetdaktsüogo.
Taküm küm tetenzüklen Prime Minister Narendra Modi-i mining aser urban development amala ministry tem dang ISRO den yaritepa nübortem tajungtiba nung tenzüktsü tetuyuba agüja liasü.
IBM-i ali rongsen agitetba maparen mita reprangtsü atema Indian Bureau of Mines (IBM)-ISRO MoU renemogo, ta sorkar ketdangser kati ashi.
“Iba MoU nungi tajangzük angubatem reprangdangba sülen Mines Ministry-i state tem dang pei pei litsü nung iba inyakyim ajanga ozüng alema nakmati atuba maparen mittsü atema bilemdangtsü shiogo” ta ketdangserisa ashi.