Satwik-Chirag nati takok tajung angu; Saina tsükogo

Luroi/August 1, 2019 (Agencies): Mapang tatsüka yirur masayateti aruba sülen meyipa aruru asayba nung Saina Nehwal Thailand Open tanabuba round nung Japan tsür Sayaka Takahashi-i tsükdakja quarter final metongteti asayamung nungi tuguogo.
Ajisüaka India nunger tebur tarep asayar Satwiksairaj Rankireddy aser Chirag Shetty nati Indonesia nunger asayar Fajar Alfian aser Muhammad Rian Ardianto na koka quarter final-i iogo.
Saina, shibai mezüngbuba round nung Phittayaporn Chaiwan koka liasü, la tanabuba round game tanabuba aser tasembuba nung Takahashi-i koka 21-16, 11-21, 14-21 agi tamakok angu.
Kasa asayamung tebur kija asaya nung Kidambi Srikanth aser Parupalli Kashyap nata tanabuba round nung tsükogo. Brehostibarnü tanabuba round asaya nung Srikanth, Phetpradab-i 21-11, 16-21, 12-21 agi koka liasü.
Maneni Parupalli Kashyap-a Taiwan nunger Indonesia Open winner Chou Tien Chen-i 9-21, 14-21 agi minute 33 nung ayong ayonga kokogo.
Ajisüaka Satwik aser Chirag nati Alfian aser Ardianto na 21-17, 21-19 agi koka quarter-finals-i iogo aser India nunger tem nem timla agütsüogo.
Tang agi asayamung anabuba atonga Satwik o Chirag na quarter-final tongtetogo. Taoba hopta Japan Open nunga tena quarter tonga asayaogo, saka Japan nunger tarep Takeshi Kamura aser Keigo Sonoda nati tena tsükdakja liasü.
Satwik aser Chirag na quarter final nung South Korea nunger asayar Choi Solgyu aser Seo Sueng Jae na den asayatsü, shirnok qualifiers nungi atuba lir.