Satyarthi-i Bharat yatra sentong tenzüktsütsü

Guwahati, September 3 (Agencies): Nobel peace ngur alisang Kailash Satyarthi-i Guwahati nungi Siliguri tashi Bharat Yatra, northeast leg, September 22 nü lapoktsü. Bharat Yatra ya, India ya tanurtem atema tekümzükba anguba linük ka kümdaktsütsü asoshi tesayuba balala agütsüba sentong ka lir aser iba sentong ya Kanyakumari nungi September 11 nü tenzüktsü aser New Delhi nung October 16 nü tembangtsü.
Kailash Satyarthi-i tenzükba Children’s Foundation ajanga Hokolbarnü sangdongba agi, iba yatra ya tanurtem shibelenba aser tashiyim agi raksatsüba anema raratsüba atema lir. Guwahati nung iba sentong ya September 22 nü tenzüktsü aser iba campaign-march yagi Siliguri September 27 nü atongtsü. Iba yatra ya Vivekananda Memorial tesem nungi tetenzüktsü.
“Tanurtem anema mapa tamajung inyakba ya magizükteter. Iba anema ya linük nung aliba nüburtem tejakleni aru nungdang akoktsü. Ni nenok ajak iba yatra nung arua shilem agitsü asoshi mepishir,” ya Guwahati University vice-chancellor Mridul Hazarika-i ashi.
National Crime Records Bureau aser National Family Health Survey-3 ajanga ashiba agi, tanur asüdang kibong kümdaktsüba ya Assam nung tebilemtsüka lir kong tetsür tanur 1,28,554 aser tebur tanur 1,34,214 küm metongjungi kibong kümdaktsür.