Saudi Arabia election nung tan mezüngbuba atema tetsürtemi shilem agi

Riyadh, December 12 (Agencies): Saudi Arabia nung tanü otsü tasen ka yangluogo aser ibaji, tan mezüng tetsürtemi municipal elections nung vote agütsüba lir.
Ano, Saudi Arabia nungsa tan mezüng election nung tetsürtemia candidate ama toktepogo. Ajisüaka, alima nung tetsür nem gari manidaktsüba linükji Saudi Arabia lir.
Tanü agiba election asoshi tetsür candidate ajak agi parnok 978 liasü aser tebur 5,938 liasü. Election atema nüboyimba sentongtem nung tetsür candidate tem tenokdangba ka yur ang o jembitsü mela mesüra parnok tenüng nung tebur kari yimjak nung jembi, ta state media osang ajanga metetdaktsü.
Saudi Arabia nung municipal councils election nung tashi kangabo mali saka tan election ajanga Saudi tsürtemi atema alizüng tongtipang ka tongogo.
Saudi Chuba yimsüsüba kübok election balaka magir aser Saudi nunger election agibaji tanü agiba züngsema asemben dang lir.
Tetsürtem election nung shilem agidaktsütsü telemtetba ya asür King Abdullah-i agiba lir. Pa yimsüsüba kübok yimtenren nung temelenshi bener arutsüba mapa inyakba nung iba ya tongtipang shilem ka liasü.
Asür King Abdullah-i pa masüdang, “Saudi Arabia nung tetsürtemi tebilemba shitak aser tangatetba tajung sayuogo” ta ashi.
Taküm January ita pa masüdang, pai linük nung tematiba advisory Shura Council nung tetsür 30 shimoka liasü.
Honibarnü elections agiba nung council menden 2,100 lir aser iba dak alia menden talila 1,050 nung chuba-i mulunga agizükba nübotem shimoktsü.
Tanü nikongtsütsü 5:00 ako (par mapang) nung vote agütsüba tembang aser Deobarnü votes azüngtsü.