Saudi Arabia-i Haj sentong nung timtem magütsütsü metetdaktsür

Mecca, September 18 (Agencies): Alima tesem ajunga nungi Islam tamangba yimsü benshirtemi par sarasadem mapang agitsü asoshi Mecca semdanga Haj külem küjabaren taruba hopta agidang ozüng alema inyakertemi iba sentong nung timtem magütsütsü osang ka Saudi Arabia-i tanü Hokolbar nü metetdaktsüogo.

Linük balala indang sübotsü asemba Islam tamangba yimsü benshir nisung noklang aikati tanüa Mecca kübok tentetba Grand Mosque nung par Hokolbar sarasadem mapang agiba osang jangjaogo.

“Haj külem küja maparen memeshi kümdaktsütsüsa mesüra Allah tsüngrem külemer nisungtem nem lendong bener arutsütsüsa inyaker ajunga songtema merenshitsü asoshi ozü mitkartemi terenemshiba tulu agia lir,” ta Saudi Interior Minister, Chubachir Mohammed bin Nayef-i tanü sangoktsü.

2011 küm nungi tenzüka Arab lima alir Muslim nunger Sunni aser Shi’ite kin na tsüngda mangatettep adoka raratepbaren taküm 2015 küm tesashiba akümba osang bushiteta lir.

Syria aser Iraq na nung nübur o nübur rong nung tongpang kanga sashia rara tensa mejungi aliba mapang ka nung kidangsüa aliba Yemen aser Libya linük na nunga nübur o nübur na tsüngda mangatettep ken o tulu adoka rarateptsü tenzükba ajanga Arab lima nung tang tensa kanga mejungi akümba osanga bushitetogo.

Ano külen, taküm küm tenzüker tanü tashi nung Syria aser Iraq na nung lendong kanga sashia atalokdaktsüba Islamic State (IS) kiralongrar telok pusemertemi Saudi nung tentetba mosque 3 tashi nung bomb lendong tesashi atalokdakja aliba yong kümshi külemküjatsü asoshi Mecca semdangertemi taküm lendong tulu ajurutsü akok ta Saudi sorkari tebilemtsü khuret benoka lir.