Saudi Arabia-i Islamic State telok ka makdok; Züngsem 431 apu

Riyadh, July 18 (Agencies) : Islamic State den tesentaktep aliba telok ka loksatsüogo aser tang tashi nung iba telok nung züngsem 431 puogo, ta Saudi Arabia ketdangsertemi tanü metetdaktsü.

“Hopta ishika tejaklen nungi ketdangsertemi telok ka samatsütsü atema mapa inyaka aruba nung takok nguyonga arur. Iba telok ya Daesh organization (IS) den sendaktepa lir” ta interior ministry osang ajanga ashi.

Iba telok nung züngsemtem jagi bendanglen tesem kar nung mepetmesü adokdaktsütsü atema tasa atonga liasü. Parnok indang nükjidongji nisungtem tsüngda telemsa adokdaktsütsü aser mepetmesü lidaktsütsü atema lir, ta Saudi interior ministry osang nungsa shia lir.

Iba telok yagi aiben makogo aser tasa aika atongogo. Item rongnung Saudi Arabia kübok Eastern Province nung Shiite nunger mosque bomb amshia amakbatem dena lir, ta parnokisa ashi.

Islamic State-i Shiite nungerji tamangba yimsü tesayuba sülen manidakertem ta züngshir aser Shiite nunger mosque amakba atema parnoki tenüng agia metetdaktsüogo.

IS-i Iraq o Syria na nung tesem aika makdokogo aser item linük nung alirtem madak tashiyim mapa inyakba dang masü saka bendangertem aika tekolak tangzükogo.

Yaküm United States-i anir Syria nung IS anema inyakba mapa nung Saudi Arabia aser Sunni Gulf kidanger linüktemi densem.