Saudi Arabia-i kiralongraba atema nisung 14 tepsettsü

Riyadh, June 01 (Agencies) : Bodbarnü Saudi Arabia-i nisung 14 tashi kiralongraba atema aija tasüba temerenshi agütsütsü obendang agütsüogo.

Eastern Province nung Shi’ite Muslim nunger timba ser aliba tesem nung parnoki sorkar anema lungkak aitdang police amakba ken o nung aija tasüba temerenshiji agütsü.

Ano, nisung 9 küm asem nungi terpungu tashi tepuokdak ayutsü temerenshi agütsüogo, ta parnok atema okatsür kati osangbener dang ashi.

Prangpong-injang abenba aser police dak injang kaloktsüba ken o tem nung aija nisung 24 tashi tesüiba küm asem tashi tepuokdak yua liasü. 2011-14 tsüngda lungkak aitba mapang Shi’ite nunger 20 den police ketdangsertem kar tepset.

Iba dak sendakba nung osangbenertemi Saudi justice ministry den tongteprateptsü merang saka parnok den mejembitet, ta al-Arabiya TV osang ajanga metetdaktsü.

Saudi Arabia nung parnok bendanga amshir ta Saudi Shi’ite kari ashir. Saudi Arabia nung Sunni Islam tangatetba nung alir aser Shi’ite nungerji tamangba yimsü balaka amanger ama züngshir.

Taküm January 2 nü Saudi Arabia-i Shi’ite nunger pezü nem tasüba temerenshi agüja liasü. Parnok den külemi, Sunni nunger 43-i küm 10 tejaklen al Qaeda atema mapa inyak ta aija tasüba temerenshi agütsü.

Saudi Arabia linük nung obendang agütsüba inyakyimji International human rights group aikati aitsür. Parnoki ashiba agi, Saudi Arabia okadaktem nung ken o timi mangadanger aser timtem magütsüi lungkak aitertem kiralongrartem ta aija obendanger.

Saudi Arabia-i item onükji magizüker aser par linük nung ozüng ketdangsertemji sorkar den tesentaktep kecha mali ta ashi.

Ozüngi Sunni aser Shi’ite nunger bendanga mamshir aser ozüng alema mapa inyakertem ajak kasa temerenshi agütsür, ta Saudi Arabia-i ashir.