Saudi Arabia nung ‘Haj’ benjungmunger 717 ajemset

Mina (Saudi Arabia), September 24 (Agencies): Tanü Saudi Arabia, Mecca anasa Mina nung Muslim nunger ‘Haj’ temeshi aieni aortem temenen dak lung agi aontsü nungtepa aoba mapang India tsür ka densema tajemba agi nisung 717 ajemsetogo aser nisung 860 dak tema yiruogo.
1990 küma temeshi tesemtemi aoba mapang lungpok lenmang ka nung temeshi aieni aor nisung 1,426 tashi asü. Küm 25 tsüngda Muslim nunger temeshitiba tamang aieni aoba mapang lendong tamajungtiba tanabubaji iba ya lir aser iba lendong nung yirua alir rongnung India nungera ana densema lir.
Tanü par mapang 9:00 ako (India nunger mapangbo anüngdang 11:30 ako) lung jara asem nung temenen dak lung agi aontsü atema tamangertem Jamarat-i aoba mapang lokti nungtepba ajanga iba lendong atalok.
Iba lendong dak sentakba nung par linük-i ketdangsüba osangkaket, Saudi Press Agency-i ashiba agi, iba lendong ya Makkah nungi kilometer pongu shi pila oor Jamarat-i aoba lenmang ana ajurutepba tesem ka nung atalok.
Saudi civil defence-ia, linük balala nungi temeshi aieni aor 717 süogo aser nisung 863 yiruogo, ta metetdaktsü.
Jeddah nung India Consulate-ibo, tang tashi nungbo India nunger asüba osang mali, saka Assam nungi India tsür ana yirua hospital nung yaridar, ta ashi.
Ano Thiruvananthapuram nung Kerala Rural Development & Non Resident Keralite Affairs (NORKA) Minister, K C Joseph-i, Kerala nunger tebur ka tenüng agi Mohammed süogo, ta ashi.
2006 küma ‘Haj’ mapang Jamarat nung temeshi aini aor tajemba agi 346 süa liasü.