Saudi Arabia nung India nunger 29 kümzükogo: Swaraj

New Delhi, March 31 (Agencies): Saudi Arabia nung India nunger aayanger parnok 29 pua aliba India sorkari kümzükogo aser parnok nem tayimtsü tickets agutsütsü, ta Brihostibar aonung External Affairs Minister, Sushma Swaraj-i metetdaktsü.
Telangana minister, K T Rama Rao-i Sushma Swaraj dang state nungi Saudi Arabia nung aayanger parnok 29 company kati pua aliba nungi kümzüktsü asoshi mepishia liasü.
“Onoki Saudi Arabia nungi aayanger 29 kümzükogo. Onoki parnok indang tayimtsü tickets atema-a sen agutsütsü,” ta lai twitter ajanga ashi.
Rao ya Telangana nung NRI Affairs & IT Minister lir, aser pai shidi ka ajanga Swaraj dang, state nungi aayangertem nem chiyungtsü aser nüngdakbatem magütsür, aser company jagi parnok chioktsü atema nisung shia dang nungi US sen 50,000 akhanger, ta metetdakja liasü.