Saudi Aramco nung mi lendong ajanga trok asü 206 yiru

Riyadh, August 30 (Agencies): Saudi Arabia nung totzü company tettsüdi, Saudi Aramco meyong complex nung mi lendong ataloka, tajemba agi nisung trok asü aser 206 yiruogo. Iba complex nung yangji inyakertem alir, ta ketdangsertemi ashi.
Iba mi ya Khobar anüdoklen aliba yimti indang intong teküpoklen nungi mezüng adok, ta parnok civil defence-i twitter ajanga metetdaktsü.
Parnoki ashiba agi, teyirur aika mekümzüktettsü amai aser parnokji linük balala nungi lir. Ajisüaka parnoki tenüngbo memetetdaktsü.
Parnok meyong civil defence website nung mi adokba ki ka indang kichibatem nungi mokozü tanak adoka tangokba noksa enokja lir.
Ketdangsertemi ashiba agi, helicopter tem ajanga mi den raraba mapang anasa alirtemi tesem azüngteta doktsür oa liasü.
Saudi Aramco ya alima nung totzü company rongnung tulutiba lir aser parnoki iba tatalokba nung bushisüngdang mapa tenzükogo, ta metetdaktsüogo.
Onok den linük 77 nungi arua inyaker aser parnok nisung 61,000 dak tema lir, ta par company-i ashi.