Saudi Chuba-i Modi nem Saudi Arabia civilian sempet tematiba agütsü

Riyadh, April 3 (Agencies) : Deobarnü Saudi Arabia-i India Ato kilonser Narendra Modi nem King Abdulaziz Sash agütsü aser iba ya Saudi Arabia nung civilian sempet tematiba lir.
Deobarnü Saudi Chuba, Salman bin Abdulaziz-i Modi nem iba sempet agütsü.
Taoba mapang Saudi Arabia-i iba sempet ya alima lennir kar nem agütsüogo aser parnok rongnung Japan Prime Minister Shinzo Abe, British Prime Minister David Cameron, US tir Barack Obama, Russia tir Vladimir Putin aser Egyptian tir Abdel Fattah el-Sisi nungertem dena lir.
Deobarnü Ato kilonser, Narendra Modi-i Saudi Arabia Chuba, Salman bin Abdulaziz den linük ana tsüngda shishilembaba, investment aser kiralongraba anema amalitepa inyaktsü atema tongtibang onüktem jembiogo.
India nunger nem crude oil timtiba suppy asüba linükji Saudi lir, aser linük anapronglai iba sector nung amalitep jenjang tajungba akümtsü bangjemogo.
Yashi Modi-i US, yimtiba Washington nungi Riyadh tonga aruba sülen Royal Court nung Chuba Salman-i pa agizüka liasü.
Tesüiba ita tenet nung Modi-i Gulf linük ya tanaben semdanger. Gulf tesem ya India atema tongtibang tesem ka lir, kong India nunger million 8 lir aser India’er energy security atema kanga tongtibang tesem ka lir. Yaküm August ita nunga Modi-i United Arab Emirates (UAE) semdanga liasü.
Tesüiba küm 20 tsüngda India aser Saudi Arabia na tsüngda energy tesentaktep nung ajemdaker tesentaktep tajungba kümdar.
Totzü sector dak alia linük anapronglai rongsenkettsüng nunga tesentaktep tajungba kümner.
Tanep Saudi Foreign Minister, Adel Aljubeir-ia Modi ajurua linük anapronglai jangraba onüktem nung o lemtepa liasü.
Health Minister aser Saudi Arabia’er national oil company Aramco tongti, Khalid A Al Falih-ia Modi ajurua liasü, iba mapang nung pai Modi dang, Aramco company-i investment atema India dak rangloker, ta metetdaktsü.
“Minister Al Falih-i Ato kilonser dang, Saudi Aramco-i India ji investment atema mezüngbuba nükjidong ayur ta shiogo,” ta External Affairs Ministry otongdar, Vikas Swarup-i twitter ajanga ashi.
Tanep Modi-i Saudi aser India nunger shishilemba nisung 30 den shisa lemsatepa liasü, aser iba mapang nung Modi-i company balala nungi CEO tem dang India nunger defence, energy, railway, health aser aluyimiba sector nung sen intokang ta ashi.
Saudi Arabia semdanger India nunger Ato kilonser pezübabaji Modi lir. Taoba mapang India Ato kilonsertem- Jawaharlal Nehru-i 1956 küm iba linük semdang, Indira Gandhi-i 1982 küm semdang aser Manmohan Singh-i 2010 küm iba linük semdanga liasü.