Saudi Chubachir & Defense Minister, Salman-i Obama den ajurutep

Saudi Arabia’er Deputy Crown Prince & Defense Minister, Mohammed Bin Salman (Abelen)-i US Tir, Barack Obama den White House kübok Oval Office kilung nung senden ka amendang agiba oksa ka yangi angur. (White House, June 18)

White House, June 18 (Agencies): Saudi Arabia chubachir, Deputy Crown Prince Mohammed bin Salman-i US Tir, Barack Obama den Washington kübok Oval Office nung ajurutepa senden menogo.
Saudi Chuba, King Salman’er jabaso, arishi küm 30 tain Salman-i tang par Saudi deputy prime minister aser defense minister menden aroki bena lir.
Saudi linüki totzü nung melatokbaren tarutsü mapang, 2030 tashi nung tajemba kümdakja, par Saudi linük indang rongsenren jenjang tajungba küma melenshitsütsü asoshi Salman-i alizüng yua lir.
Salman-i tan US semdangdang Obama den White House kübok Oval Office nung ajurutepa senden amenba den külemi,  Congress yimsüsür aser US Secretary of State, John Kerry nunger densema, tongti US ketdangsertem dena senden balala amenba osang angazükogo.
“Ozü lenir, Salman-i US Defense Secretary, Ash Carter dena senden ka mena, ozü linük ana tsüngda tesendaktep tajungba küma yanglushitsü onük benokba den külemi, tan Syria, Iraq, Yemen, Libya aser Iran nunger nung tensa mejungi aliba den sentakba onüktema benoka liasü,” ta Saudi Foreign Minister, Adel al-Jubeir-i osang jangjashitsü.
“Syria nung tongpang rarabaren anentsütsü asoshi inyakba maparen nung Saudi sorkari alima teloktep linüktem maneni pusema nungitsü nangzüker. Syria nung tongpang rarabaren manen tashibo par linük nung yimtenren tebentetbaren bener marutsütettsü,” ta Salman-ia Obama den ajurutepdang metetdakja liasü.