Saudi den sen billion 11 jenjang aketba tezüngzüktep agiogo: Valls

Riyadh, October 13 (Agencies): France sorkari dollar sen billion 11.4 jenjang aketba tezüngzüktep Saudi Arabia den agiba osang ka France Ato Kilonser, Manuel Valls-i tanü Mongolbar nü metetdaktsüogo.

“Tir Francois Hollande lenisüba kübok ozü France aser Saudi sorkar na tsüngda rongsenren aser yimtenren tesendaktep tajungba akümtsü tenzüka lir,” ta shia, tang Riyadh semdanga alisang, Valls-i tan tezüngzüktep agiba osangji metetdaktsü.

Saudi-i France nungi patrol rong 30 alizüktsü densema, par linük ana tsüngda energy, health, chiyongtsü, satellites aser ki o jen balala densemba tezüngzüktep tan agir lir.

Arab lima nung tentetba linük rong nung rongsenren jenjang tajungba aliba linük, Saudi sorkari nübur temeten anema inyakba ken o nung ajemdaker alimai par linük aitsüaka, France sorkari küm 1 tejaklen nungi tenzüka par linük den tesendaktep tajungba küma yanglutsü tenzükba osang bushiteta lir.

France aser Saudi na tsüngda shishilembatsü tesendaktep tajungba kümdaktsütsü sabang ka Valls-i yashi, Hombar nüa Riyadh yimti nung lopkja liasü.

Par Defence Minister, Jean-Yves Le Drian anisemsang, Valls-i taoba hopta Jordan o Egypt na semdangba sülen tan Saudi Arabia semdanger lir.

Ano, par linük ana tsüngda telecommunications aser surveillance satellites den sentakba tezüngzüktep agitsü asoshi jembiteptsü tenzükba osanga jangjaogo.

Ano külen, France-i Russia dang ayoktsü asoshi renemba tongpang nung amshitsü Mistral warship rong 2 tashi alizüktsü asoshi Egypt-ia France sorkar den toaba hopta tezüngzüktep agia liasü.

Aji oda, Saudi sorkar nungi teyari agia, Egypt sorkari tongpang nung amshitsü rong anaji alizüktsü asoshi France sorkar nem euro sen million 950 tashi agütsütsü nangzüktepogo.

France-i taküm 2015 küm tenzüker tanü tashi nung tongpang nung amshitsü Rafale jet fighter tayimtsü 24 tashi Egypt aser Qatar na dang ayokba osanga bushiteta lir.