Saudi embassy nung mi senoktsür parnok 40 pua lir

Tehran, January 03 (Agencies): Tehran nung aliba Saudi embassy memeteti aliba mapang ka nung nungpoka aita maker mi senoktsür parnok 40 tashi Iran police temi pua lir, ta police ketdangser tejen kati Deobarnü metetdaktsü.
Obendanger General Abbas Jafari Dolatabadi-i, Embassy amakba dak sentakba nung tang pua alirtem den külemi ano mepusemi alirtema bushia pua arutsü atema court ajanga temelaba agütsüogo, ta ashiba Xinhua News agency ajanga metetdaktsü.
Saudi Arabia nungeri Shia telok nung tanishir ka tepsetba atema Honibarnü Iran nunger telok tulu kati lungkak aita Tehran nung aliba Saudi embassy maka mi senoktsü.
Saudi interior ministry-i Shia telok lenir Nimr al-Nimr den parnok züngsem 46 tashi alenseta südaktsüogo, ta sangdongba sülen gondha ishika lir embassy nung mi senoktsü.
Linük nung aliba police tem dang Saudi Arabia nunger indang embassy kümzüka ayutsü asoshi Iran foreign ministry ajanga Honibarnü tetuyuba agüja liasü.
Honibar anepdang tsütsü Iran foreign ministry-i Saudi Arabia ambassador Tehran-i jaoka Nimr al-Nimr alenseta südaktsüba aija liasü.