Saudi-i aibelener 130 buba tepseta merenshir

Riyadh, September 03 (Agencies): Saudi Arabia-i nisung tepsetba ken o nung aitsüba sülen aibelener ka tanü Brehostibar nü tepseta merenshiba osang jangjaogo.

“Mashari al-Shammari-i prangpong 1, kotari 1 aser süng 1 amshia külem sensopur, Sufouq al-Shammari tepsetba kuli bushitetba sülen pa tanü tepseta merenshiogo,” ta Saudi interior ministry-i osang jangjashitsü.

Mashari-ji Iraq arrtsülen, Hafr al-Baten jila nung tepseta merenshi ta ministry-i shisem.

Mashari tepsetba ya densema Saudi sorkari taküm 2016 küm tenzüker tanü tashi nung aibelener 130 buba tepseta merenshiba osang bushitetogo ta AFP osangi metetdaktsü.

2014 küm aibelener ajak agi nisung 87 tepseta merenshiba densema Saudi sorkari taoba mapang nungi taküm aibelener timba tepseta merenshiba osang bushiteter lir ta osangi shisem.

Aibelenertem tepseta merenshiba maparen anena atatsü tajungshiba olen ka alima ajunga nung nübur temeten asoshi nokdakba tongti telok, Amnesty International-i Saudi sorkar den benok saka Saudi sorkari iba tajungshiba olenji magizüki lir.

Ozüng alema mozü mora shibelenba, nisung tepsetba, tongpang oset bener rakzükraktemba, tetsür tashiyim agi raksatsüba aser pei tamangba yimsü sendokba ken o nung aibelener nem tasüba temerenshi agütsütsü asoshi Saudi’er Islamic ozüng nung lateta lir.