Saudi-i ozüng alema inyakba maparen memimbangtettsü: Rouhani

Tehran, January 05 (Agencies): Saudi Arabia-i Tehran den tesendaktep alangdangba agi par linüki ozüng alema inyakba maparen memimbangtettsü ta Iran Tir, Hassan Rouhani-i tanü Mongolbar nü sangoktsüogo.
Saudi sorkari tongti Shiite putir ka tekong tangja merenshiba atema kanga jashia, Iran nung alir longkak aiter telok kati Tehran nung tentetba Saudi embassy kidang mi senoktsü.
Yamaji atalokba sülen Saudi, Bahrain aser Sudan linüktemi Iran den tesendaktep alangdanger ta sangokja par linük tentetba Iran embassy ketdangser ajungai par linük toktsütsü tuyu.
“Saudi Arabia-i ozü Tehran den tesendaktep alangdangba agi par linüki tongti tamangba yimsü lenir, Nimr al-Nimr tespeta merenshiba maparen memimbangtettsü,” ta Rouhani-i kanga jashia ashi.
Saudi sorkari Nimr den külemi, Shiite nunger 3 aser Sunni al Qaeda jihadist nisung 43 tashi tepseta merenshia liasü.
“Linük balala tsüngda adokba mangatettepbaren ajunga jembitepba ajanga bentettetsü aser linük o linük na tsüngda telungjem aliba ajanga dang pei region nung tentetba kiralongrartem madak takok ngutettsü,” ta Rouhani-i sangoktsü.
Tan tensa mejungi akümbaren tajungba kümdaktsütsü nükjidong nung Saudi embassy ki amakertemji par senso masü ta Iran sorkari metetdakja lir.
“Pei jurila tajangzük angutsü nükjidong nung mejangjatetba nisung kari Saudi embassy ki amakba osang jangjaogo,” ta Iran sorkar otongdar, Mohammad Bagher Nobakht-i sangoktsü.
“Saudi sorkar metentsütsü tangatetba nung Saudi sorkar pusemertemi Saudi embassy ki amakba osang jangjaogo,” ta Iran Justice Minister, Mostafa Pourmohammadi-ia metetdaktsüogo.

You must be logged in to post a comment Login