Saudi-Iran tesentaktep yanglutsü atema Indonesia-i mapa inyaktsü

Jakarta, January 12 (Agencies) : Indonesia-i Middle East nung yimjung wazüka yudaktsünüba agi Saudi Arabia aser Iran tsüngda tiyongtsü nung mapa inyaknür, ta Mongulbarnü Indonesia ketdangser kati ashi.

Alima nung Muslim nunger nütsüng timba aliba linükji Indonesia lir, aser parnok timbaka Sunni nungertem lir saka parnoki Islamic lima nung shilem balaka magir.

January 2 nü Saudi Arabia-i Shi’ite tamangba lennir Nimr al-Nimr nem tasüba temerenshi agütsüba sülen Sunni nunger linük Saudi Arabia aser Shi’ite-i yimsü asüba linük Iran tsüngda tesentaktep tamajungba aküm.

Saudi Arabia-i Nimr tepsetba inyakyim ajanga Shi’ite nungertem kanga jashidaktsü aser lungkak akitertemi Iran nung Saudi embassy amakba sülen Saudi Arabia-i Iran den tesentaktep mayutsü telemtetba agia liasü.

Tan hopta Indonesia Foreign Minister Retno Marsudi-i Middle East semdangtsü aser Saudi Arabia o Iran tongti ketdangsertem den ajuruteptsü.

“Middle East nung tensa meraksadaktsütsü atema Indonesia-i shilem agitsü mulunga lir” ta Indonesia Foreign ministry otongdar Armanatha Nasir-i osangbener dang ashi.

“Linük ana tsüngda tesentaktep melii kümra, iba jagi Middle East nung dang masü saka alima nung timtem bener arutsütsü. Anungji linük anaprongi kati ka angatettepa tesentaktep yanglutsü imlar” ta paisa ashi.

Küm ishika tejaklen nungi Indonesia nunga züngsem nung tangar memenepba Shi’te nunger anema tashiyim mapa inyakba tatalokbatem kar atalokogo aser Middle East nung Sunni aser Shi’te nunger tsüngda mepetmesü adokba ajanga par linük nunga timtem tuluba akümtsü ta Indonesia sorkari tsübua bilemer.

Tawa tu anti-terrorism police-i Indonesia nung Shi’ite lennir kar amaktsü tasa atong ta temulung melemi bilemer nisung pezü puogo.

Indonesia nung Sunni telok Islamic State (ISIS) pusemer nisung 1,000 den timba lir aser Middle East nungi Indonesia nunger ISIS activists aika linüki meyipa arua lir ta ketdangsertemi metetdaktsüogo.