Saudi nung India nunger mapa makai akumer 800 timtemdar

New Delhi, July 30 (Agencies): Saudi Arabia yimti, Jeddah nung India nunger nisung 800 jungnüa mapa makai akümba sülen tesüiba anogo asem tashi aya-tzüraa timtemtepdar, ta osang tejangja angazükba sülen Minister of State for External Affairs, VK Singh iba linüki aotsü atema tuyuogo.
Tanü Honibarnü External Affairs Minister, Sushma Swaraj-i, Saudi Arabia nung Indian Embassy dang parnok nem chiyungtsü agüjang ta  tuyuogo, ta metetdaktsüba den külemi lai iba tensa reprangdar, ta shisem.
Nisung kati, Jeddah nung India nunger nisung 800 jungnüa tesüiba anogo asem tashi aya-tzüraa timtemtepdar, ta shia sorkar dang teyari meshiba sülen Sushma-i item mera agiogo.
Sushma Swaraj-i twitter ajanga, “Onoki Indian Embassy Riyadh dang Saudi Arabia nung mapa makai akumer India nunger nem chiyungtsü angati agüjang ta tuyuogo,” ta metetdaktsü.
Lai ashiba agi, Saudi Arabia aser Kuwait linük na nung alir India sensotem aika parnok mapa aser aayangba taa tsütsülen timtemdar, aser iba tensaji Saudi Arabia nungsa tamajungba lir.
Laisa, MoS External Affairs, M J Akbar-i iba tebilemtsü onükji Kuwait aser Saudi linük ketdangsertem den jembitsü, ta metetdaktsü.
“Item tebilemtsü onüktem bentettsü atema kü den külem tenzüker General V K Singh Saudi Arabia-i aotsü aser MJ Akbar-i kasa onükji Kuwait aser Saudi ketdangsertem den jembitsü,” ta Ministry of External Union minister- Swaraj- isa ashi.
“Saudi Arabia nung India nunger mapa makai akumer nisung shinga mechiyungi malitsü ta ni züngbong nenok dang ashir. Ni iba tensa ya ghonda shia reprangdar,” ta Sushma-i ashi.
“Saudi Arabia aser Kuwait na nung India nunger aika mapa makai kümogo, aser parnok nem mapa agütsürtemi parnok taa magütsü aser factory tema shibangogo,” ta lai ashi.
Item kuli ajanga Saudi Arabia aser Kuwait nung asen adianutem aser aianutsürtem kanga timtemdar,” ta laisa shisem.