Saudi nungi sorkari India nunger 10,000 anir arutsü: Sushma

New Delhi, August 01 (Agencies): Saudi Arabia linük nung India nunger 10,000 shi linüki meyipa anir arutsü aser parnok shinga chiyungtsü agi anünga malitsü, kechiyong parnok nem chiyungtsü lemtsüogo, ta tanü External Affairs Minister, Sushma Swaraj-i Parliament nung metetdaktsü.
Deputy External Affairs Minister, VK Singh Saudi Arabia-i oa parnok anir aruba maparen ajaayangtsü, ta lai Parliament House anaprong nung metetdaktsü.
Lok Sabha aser Rajya Sabha naprong nung züngsemtemi Saudi Arabia nung India nunger timtemba atema tebilemtsü akaba mapang Swaraj-i parnok dang, Indian Embassy-i camp pongu amenoka parnok nem chiyungtsü agütsür, aser tang tashi lai ghonda shia parnok den tongtepratepdar, ta ashi.
“Asen nisung aayangertem shinga aya-tzüraa malitsü. Ni iba ya züngbong Parliament ajanga linük dang ashir. Onoki parnok ajak India-i meyipa anir arutsü,” ta laisa ashi.
India nunger tekaratiba nung meyipa anir arutsü atema Centre sorkari Saudi Arabia nung foreign aser labour office den tongtepratepa inyakdar, ta laisa ashi.
Swaraj-i ashiba agi, iba linük nungji parnok nem mapa agütsürtemi No Objection Certificate (NOC) magütsüra parnok nem ajungbena visa magütsütsü ozüng lateta lir.
Sorkari Saudi sorkar dang parnok nem exit visas agüjang, kechiyong parnok nem mapa agütsürtemi linük toktsür ogo, iba den külemi parnok nem magütsüi aliba taa agüjang, kechiyong parnok nem ita aika taa magütsü, ta sorkarisa mepishiogo.
Laisa, camp pongu nungji anogo 10 nü atema chiyungtsü lemtsüogo, ta Parliament züngsemtem dang metetdaktsü.
Lok Sabha nung opposition züngsem kari tasüngdangba kar benok, ajisüaka Speaker, Sumitra Mahajan-i parnok nem temelaba magütsüi, “Lai (Swaraj) ajak inyakogo. Lai mapa tajung inyakogo. Shingaia iba tashi bo meinyakdang,” ta ashi.
Swaraj-i osangtem metetdaktsübaji Rajya Sabha Chairman aser züngsemtemi kanga pelaa agizük.