Saudi osangbener ya reshikangshia amshir tekolak dangzüka yok: Report

Ankara, Mongputeni/Oct. 17 (Agencies): Saudi osangbener Jamal Khashoggi ya Istanbul nung Riyadh indang consulate nung reshikangshia amshir tekolak dangzüka yok, ta sorkar busemba osangkaket, Yeni Safak nung Rasemnü sangdong aser audio recording angashiogo, ta ashi.
Khashoggi tepseter ta temulung melemi alirtemi osangbener ya asüngdangyaba mapang pa temeyongtem alangdoka reshikangshia amshi aser iba tatalokba indang recording aika angashiogo, ta Yeni Safak osangkaket nung shia lir.
Iba sülen Washington Post nem osang agütsür, Khashoggi tekolak dangzüka yok, ta osangkaket ajanga ashi.
Turkey tsür tetong den kibong akümtsü lia Khashoggi ya official document kar abeni consulate telungi aiba sülen sama. Pa ya Saudi ketdangsür nisung 15-i akümba special team kati tepset südi, ta Turkey police temi ashir, saka Riyadh-ibo tamendakdak mali aitsür, ta ashir.
Tenüng maliba US aser Turkey ketdangsürtemi audio aser video recording nung ajemdaker Khashoggi ya consulate telung nung tepset aser temang anüka rangsaba kuli sayur, ta ashiba osang Washington Post nung taoba mapang sangdonga liasü. Saka iba tapes angashiba osang Turkey osangkaket nungbo tang mezüng sangdonger.
Khashoggi indang Apple Watch ajanga pa dang asüngdangya asüba, reshikangshia amshiba aser tepsetba record süa lir, ta sorkar busemba osangkaket, Sabah nung sangdong, saka iba osangkaket nung shia aliba ama watch yagi record mesütettsü, ta mongi karibo ashir.
Khashoggi reshikangshia amshiba mapang Istanbul nung Saudi Arabia idang consul, Mohammed al-Otaibi-i, “Kimalen inyakang. Nai ni timtem nung anioktsü,” ta ashiba tape ka nung angashi, ta Yeni Safak ajanga ashi. Maneni tape tanga ka nung mejangjaba nisung kati Otaibi dang, “Na Saudi Arabia-i arudang taküm linüra ola tadok!” ta ashiba angashi, ta osangkaket ajanga ashi saka item tape ya komaser ngutetar shia mali.
Khashoggi samaba ken o nung shilem ka ama Turkey ketdangsürtemi Otaibi’er ki mita bushitsü lia pa Sangtennü Riyadh-i ogo.