Saudi sorkar den mangatettep ken o angatetteptsü imlar: Rouhani

Islamabad, March 27 (Agencies): Middle East nung tensa jungdaktsüba den külemi, terenlok lidaktsütsü nükjidong nung Saudi Arabia den tanaben sentaktepshia, tesendaktep tajung ayutsü alizüng ayuba olen ka Iran Tir, Hassan Rouhani-i tanü, Deobar nü metetdaktsüogo.
“Jembitepba senden amenba ajanga Saudi den adokba mangatettep ken o bentettettsü imlar. Ajisüaka, ozü Iran aser Saudi nati tanü tashi jembiteptsü senden amentsüsa lenmang monguteti lir,” ta yashi, Honibar nü nungi tenzüka Pakistan semdangsang, Rouhani-i tanü metetdaktsü.
Saudi sorkari Shiite nunger tamangba yimsü lenir ka taküm January ita tepseta merenshiba nem telangzüba agüja Tehran nung alir longkak aiter telok kati Tehran nung tentetba Saudi embassy ki amakba sülen Saudi-i Iran den tesendaktep ajak agiena liasü.
“Iran-i Saudi yimli den tesendaktep mejungi melinür. Iran ya Muslim lima nung linük tulu ka lir aser Saudi sorkari Muslim lima nung tongti shilem agir. Anungji, ozü linük ana tsüngda mangatettepbaren ajunga agiena sendaktepshitsüji kanga dang tongtipang,” ta Rouhani-i nenshia ashi.
“Iran aser Saudi na tsüngda mangatettep adokba ajanga Muslim lima ajunga nung terenlok aser yimji yimjung alitsüren nokdanger,” ta paisa shisem.
Tarutsü mapang nung par linük anati mangatettep ken o ajunga bentettsü imlaba olen ka Rouhani-i metetakja liasü.
Paisa ashiba agi, Iran-i alima tashi abenba linüktem den nuclear tezüngzüktep takok ngua agiba ajanga mangatettep ken o ajunga jembitepba ajanga angatetteptsü akoker ta kuli tejangja angur.
Rouhani-i Iran Tir menden benokba sülen tan mezüngsüa Pakistan semdanger lir.
Aji oda, pai tan Pakistan semdangdang Pakistan lenirtem den shishilembatsü, rongsenren, energy aser linük kümzüka ayutsü densema, tezüngzüktep ishika agiba osanga bushitetogo.