Saudi sülen anidaka, Bahrain-ia Iran den tesendaktep alangdanger

Tehran, January 04 (Agencies): Saudi Arabia sülen anidaka, Saudi pusemba linük, Bahrain-ia Iran den tesendaktep alangdangtsü lemtetba osang ka tanü Hombar nü metetdaktsüogo.
Iran nung longkak aitertemi Tehran yimtiba nung tentetba Saudi Embassy telungi tashiyim agi aiba ken o nung ajemdaker Bahrain-i Iran den tesendaktep alangdangtsü lemtetba osang sangoktsüba den külemi, par linük tenzükba Iran embassy ketdangsertemi ghonda 48 tsüngda nung Bahrain toktsütsü tetuyuba agütsüogo.
Saudi-ia par linük tenzükba Iran embassy ketdangsertemi par linük anogo 2 tsüngda nung toktsütsü tetuyuba yashi Deobar nü agüja lir.
Saudi nung tenzükba Iran embassy ketdangsertemi Saudi toktsütsü renemba osang ka Iran Foreign Ministry otongdar, Hossein Jaber Ansari-ia tanü metetdaktsüogo.
Saudi sorkari tongti Shiite putir, Sheikh Nir al-Nimr tepseta merenshiba atema jashia longkak aitertemi Tehran nung tentetba Saudi embassy ki nung mi senloktsüba den külemi, Mashhad nung tentetba consulate ki-a raksatsü.
Iran sorkaria longkak aita Saudi embassy ki amaker nisung 40 tashi pua aliba osang jangjaogo.
“Saudi sorkari al-Nimr tepseta merenshiba maparen aitsür. Ajisüaka, longkak aitertemi Saudi embassy ki amakbaji tamendakdak maliba maparen inyaker lir,” ta Iran Tir, Hassan Rouhani-ia tanü metetdaktsüogo.

You must be logged in to post a comment Login