Sayatenya nung kü shilem. Yohan 2:1-11

Asen Kibubai teti asen tajungtiba akanger. Asen tajungtiba nung tanabuba tajungtiba den Pai mapa meinyaker. Kodang asen akaba tematokdir Pai talila taochi agütsür. Asen Masteri Pa tajungtiba meinyakdang tama aseni asen tajungtiba inyaktsüla. Asenoki “mori nungji tzü” sünga enoktsüla. Asenoki “amtsük pungu” aser “ango anaji” agütsütsüla. Asenoki “zütsükji tzü” nung aontsüla! Asenoki “anebtsü mulungtsüla” aser asenoki noktaktsü merangtsüla! Hau, Kibubai asen tajungtiba aginer.
Kibubai asen tajungtiba Pa asoshi tajungba melenshitsür. Pai tzü agi yi tanangtiba kümdaktsü. Pai metsüjang tekabu kati alu ruba jenti kümdaktsü. Asenok taginüba asenok tajungshiba kümdaktsür. Asen temulungtetba taochi miim tashi ain kümdaktsür.
Mosai pa ajok pa ket nung amma ali tashi sayatenya matalok. Kodang pai Tsüngremi ashi nung tashi angaa pa ajok pa teka nungi chioka ali nung tsükdaktsü, per taküm aser Ejip nunger magic per ajak pa ajok agi akümba peri meyok. Asen ket nung aliba amtsükji temeshi aküm aser benjung pai pasasa iba nung jungkai adok. Asen sensaksemji Tsüngrem den lungjemba akümer, aser asen mulungjang nung arunger. Pai lemang nung asenok den jembidang asen “mulungjang nung arong.”
Asen Kibuba tatem tashi yi tajungtibaji ayu. “Nenoki iba dang nungi tuluba inyaktsü!” “Ni nenok tanaben ajurutsü” aser idangji temelenshi tulu alitsü! “Tajungtibaji arutsü lir.” Shirnoki Tsüngrem meimer parnok asoshi Pai renema akaba tenük agi mangu, tenarongi mangashi aser nisung shisatsü agi matonger.
Kibuba, ni kü tajungtiba agütsütsü yariang. Amen.