Sayutsüngir Meren Emkong alima nungi pilaogo

Dimapur, Oct. 18 (TYO) : Nüngtugu sayutsüngir aser samaa aliba tanülatem kümzüka Tsüngrem dangi anir arusang Tsüngrem tenzüker Wb.Meren Emkong ajungbena yashi Hombar aonung alima nungi pilaa ogo. Pa arishi küm 64 liasü.
Pa taoba hopta nung ajungbena temang meshitaki aküm aser iba atema Guwahati-i ao aser yangji tahsü nung long aliba endoktsü asoshi operation agi saka yang nung jagi timtem tuluba tenzüka pa taküm tesasatsüka Hombar aonung yangji tema adok.
Pa temang Guwahati nungi tanep Mongolbar anepdang bener aruba sülen par alidak Set Free Church, Sovima, Dimapur nung nikongtsütsü Tsüngrem tenzükertemi anir nübortem aika adenshia pa den asüpila sentep temenungratsüka agia liasü.
Iba asüpila sentep nung lenir Rev.R.Meren Jamiri ashiba agi, asür Meren Emkong ya Tsüngrem tenzükertem rongnung tanüla anir arur sayutsüngir nüngtugu ka liasü. Pa ama taküm ya tenükshitsüka aser Tsüngrem wadang nung pa ya tasütait aser meranga inyakba tenzüker ka liasü ta paisa ashi.
Iba sentep sentong nung tebu tedi Rev.Kari Longcharia asür Meren Emkongi Nagaland nung asentenshi tuluba ka asoshi Tsüngrem dang mepishiba sentong tenzüka inyakba nung taküm bendanga agüja inyakba indang metetdaktsü.
Iba kasa sentong nung kinunger, kiyonger, medemer aser yimertemi asü pila o jembidang, asür Meren Emkong ya pa asangwa mapangbo kanga samaro nisung ka liasü saka 1976 küm asentenshi tulu aruba mapang pa temulung meyip aser iba anogo nung jagi pa Tsüngrem tenzükba mapa nung walunir ka aküm ta shia liasü. Pa taküm otsü ya tenyar Paul temulung meyiper sayutsüngir akümba amai liasü ta parnokisa kuli asü.
Asür Meren Emkong ya Akhoya yimtak 1952 küm June 20 nü aso. Pa temulung meyiper külen Tzümokkong arogo nunga sannükba mapa inyaka liasü. Iba sülen Dimapur nung Generation Countdown Youth Ministry nung tongti ketdangser inyak aser tesülen Set Free Ministry lapoka Tsüngrem tenzükba wadang tuluba nung ajemok. Dimapur nungsa Youth Oasis Center tenzükba mapa nung pai tongti shilem agia liasü.