Sayutsüngiren soloksoyim (2 Korinth 6:3-10)

“Jokorla nenok o, au süra au, nunga süra nunga, ta sang. Aser kechisa item dakji tali jembidir tamajungba nungi adoker.” (Mt. 5:37).
Kibuba sarasadem nung mezüngbuba temepishibaji, “Ne nung temeshi süang” ta mepishi. Aiben asenoki soloksoyima jembidang ibai mesensar. Pa tenüng temeshi mesüdaktsür! Tangashirtem nem asenoki kechi agütsür iba nung jagi Tsüngremi asenok O bendangtsü. Noklang 600 aseni ayongzükba sentep aten aser asenoki 1000 ka shi aten ta ashiba asenoki Tsüngrem nem sentsüwangshi bena marutsür kechiaser asenoki tiyazü jembir, shidakba nung asenoki Satan shiba tiyazür aser tiyazü tebu lir pa sentsüwangshir.
Asenoki timtemer yariba mission mapa aika inyaker. Asenoki 500 yari aser teyari 5000 asüngdanga America nung mission telok kar dangi zülur yok. Parnoki zülur yokbaji repranger asenoki meshibaji yoktsü. Asenoki sen nüngdaker parnok tezüluba noksaji nüngdaker aser yamaji yariteper. Asenoki iba temenen nungi temulung meyipdi.
Tawa tanü temsü metemsü meshisadangi dang “Doctor,” “Rev.” tenüngji kanga aginer. Asenoki tenüng dang nungi mapa nungang jangradi. Tesüiba mapang India nunger tenyartem rongnung tenyar tulutiba kaji “Brother Bhagat Singh” (1903-2000) liasü. Pa dang “Brother” ta dang aja. “Nenok ajak adianu” ta Yisui meshika ma? (Mt. 23:8).
Magazine sayutsüngir noksa keter osang agütsür aser tazüngertemi aji ngur Tsüngrem tenüng masü saka “Tesüngmangtsü sayutsüngir tajung” ta pa/la tenüng asanger. Yohan Baptitsübai ashi, “Pa ulutsüla, ni asotsüla” (Yn. 3:30). Aser Yisui Yohan indang ashi, “Tetsüri soba rongnung Yohan ama tulu mali” (Mt.11:11).
Asenokia teti amongtema aliba aser tagizüktettsü tenüng atema merangdi.
Kibubai “Lanlia, tamang katetba kilir tajung” ta ashitsüsa asenoki inyak.
Kibuba Yisu, Nai sayuba atema ni kü O Ne osang den memeyokteptsü yariangma. Amen.