Sayutsüngirtemi kiboksem aotsüla aser pei kibong nunga temulung agütsüsüla: Kikheto Sema

Dimapur, May 15 (TYO) : Tanela tsütsü tashimaitertem aser nüngdakbapurtem yaritsü atema sayutsüngirtemi kiboksem aotsüla aser ano pei kibong nunga temulung agütsütsüla, ta Secretary to the Government of Nagaland, Department of Land Resources, Y. Kikheto Sema IAS-i metetdaktsü.
“Sayutsüngirtemi tanela samar alirtem Tsüngrem dangi anir arur, saka sayutsüngir aikati pei wadang inyakdang pei kibong nung timtem adokdaktsür, aser iba jagi parnok tebu aser kinungbo tamajung akümer” ta Kikheto Sema-i arogo lennirtem ayongzük.
Deobarnü Ghukiye Baptist Arogo nung Sumi Baptist Theological Association (SBTA) 41 buba mungdang nung pai iba tayongzükba agütsü.
“Nenoki pei kibong meyipa reprangdangang aser na tebu, kinungbo aser kidanger tajung ka asü masüar khen shisadangang” ta Kikheto-isa ayongzük.
“Arogo ketdangsertemi tashitait Arogo sabang nungi tanela indang tesayuba dang masü saka loklitiba dak sendakba onüktem aser temenen mapatem indanga jembitsüla. Asenoki khuret dak dang merangloki telatet daka rangloktsüla” ta paisa ashi.
“Alima nung akhümket mapa tajungtem rongnung Osang tajung prokshiba mapa ya ka lir aser tanga mapatem ama masü saka Arogo mapa inyakba nung pei taküm libaliro kanga junga yanglushia alitsüla aser Tsüngrem den tesentaktep takang ayutsüla” ta Kikheto-isa laishirtem ayongzük.
“Yisu Khrista-a sayutsüngir ka liasü saka pai taküm indang tesayuba aika agütsü. Pa ama, Arogo lennirtemia tanela chiyungtsü dang masü saka loktiliba aser rongsenren indang onüktem sayutsübentsütsüla” ta paisa shisem.
Iba sentong nung tongti o jembirji Trinity Theological College Principal, Rev. Dr. Kavito Zhimo liasü aser pai Arogo lennirtem aser laishirtem dang pei teinyaktsü wadang nungi masetshitsü ayongzük.
Tsüngrem atema inyakba mapaji tezüpa masü saka Tsüngrem dendaktsür bendanga agüja aser nendaka inyak nungbo tasak masü, ta Rev. Dr. Kavito-isa ashi.
SBTA 41 buba mungdang ya May 13 nü tenzük aser Deobarnü tembang. Iba sentong nung Sumi nunger Arogo lennir noklang aika aden.