Sazo-i ajak nem tzü tajemtsü peria agütsütsü ayongzük

Kohima, March 15 (TYO) : Nagaland ajungalen Department-i nübor nem tzü tajung jemdaktsütsü asoshi mapa teinyaktsü aika lir, ta Public Health Engineering Department (PHED) Minister, Chotisuh Sazo-i tanü ashi.
Kohima nung anogoshia tzü litre million 14 nüngdaker saka PHED-i anogo nung litre million 1.5 dang agütsüteter. Iba atema mepelar, saka asenoki khen nungdang temelenshi bener marutettsü, saka asenoki timi inyakra department nung ketdangser aser staff temi takok ngua inyaktsü ni temulung alemer, ta Sazo-isa metetdaktsü.
PHE Minister menden lemzükba sülen Sazo-i tanü mezüng atema PHE Directorate semdangdang iba olen lemsatep.
1974 küm PHE department ya ‘full fledged department’ ka aküm, anungji tzü tajung agütsütsü, jana timtem melii endoktsü aser lipoküm merüka ayutsübaji department indang tebilemtsü aser teinyaktsü lir, ta paisa ashi.
Nagaland nung aliba jila aser yimtsüng ajak nung department-i mapa inyaker aser nübortem asoshi mapa tajung inyakba atema tenüngsang agütsür, ta Sazo-isa shisem.
Prime Minister Narendra Modi-i India linük kübok yimdong nung metsümeshiba anendaktsütsü atema mapa inyaker. Iba atema Nagaland nunga PHED aser sendaktepa aliba department tem nem mapa lemzüktsüogo. Asenoki, ajak atema metsümeshidak yanglutsü mapa süoki ia agizüktsüla aser Naga nungertem ajangzüktsü atema iba mapa inyaktsüla, ta PHED Minister-isa ayongzük.
Paisa Chief Minister Dr. Shurhozelie Liezietsu-i pa nem PHE department lemzüktsüba atema pelaba metetdaktsü.
Iba sentong nung mendenji Secretary to Government of Nagaland, PHED, Maongwati Aier, IAS liasü, PHED chief engineer Kevisekho Kruse-i PHED aser WSSO (PHED) director K. Ghushito Sumi-i Swachh Bharat Mission indang osangtem metetdaktsü.
Sentong nung Additional chief engineer PHED Yhusinlo Tep-i anküp tepela o jembi.