SBI-i rongsen ketdangsüba tsütsü inyakyim ka tenzüktsüogo

Bengaluru, January 14 (Agencies): State Bank of India (SBI)-i Brihostibarnü ‘SBI InCube & wealth management services SBI Exclusif’ inyakyim ka lapoktsüogo.

“Tan lapokba inyakyim rongnung rongsen junga ketdang sütetba inyakyim ya onok asoshi nükjidong tuluba sür lapokba lir kecha süra onok den High Net worth Individuals (HNI) aika lir,” ta bank nung mendenbuba Arundhati Bhattacharya-i ashi.

SBI Exclusif sentong ajanga nüburtem nem bank maparen ajak atema manager balaka atakteta yutsütsü.

“Tanü India ya joko takok ngunüba linük ka kümogo, nüburtem joko pei wadang nung koma sür tuluba inyakloka aotsü ta merangtepdang pei rongsen ketdang asütsü asoshi mapang madoker. Anungji tan lapokba sentong ajanga item nüburtem indang rongsentem ketdang asüba nung teyari tulu agütsütsü, ta Bhattacharya-i ashi.

SBI Exclusif nung kanga dang aika ajangshi aliba aser training shitak agir aliba investment nung mongintem o managertemi teyari agütsütsü.

SBI-i tan lapoktsüba rongsen ketdangsüba inyakyim tasenba ajanga ‘e-Wealth Center’ lapoktsütsü aser ibaji ajanga nüburtem bank-i maruaka internet aser mobile ajanga parnok sen sentong balala asoshi amshiba nung mapang peria entoktettsü.

SBI Exclusif ajangasa ‘wellness benefit card’ balaka den credit aser debit card amala nung teyari agütsütsü.

“Sen amshiyim tsütsü nübur aika bendanglen nungi lir ajisüaka parnoki inyakyim tejangja memeteti sen amshiteper anungji parnoki ibaji tamasa metettsü nüngdaker,” ta lai ashi.

Assistant general manager (AGM)-i aniba teloki acha ayangba, InCube ajanga asüngdangyaba tesem aser ita sen indang account tem nung teyari agütsütsü. Parnokisa e-mail ajanga ita shi osangtem yoktsü.

“Mapang talangka nungi mapa tasen tenzüknertem nem teyari agütsütsü bilema aliba tang ang mapang akümer,” ta Bhattacharya-i ashi.