SBI-i service tasen- Yono Cash tenzüktsüogo

March 15, 2019 nü AGM, SBI, Regional Business Office, Dimapur, Paogin Haokip-i State Bank of India (SBI), Main branch Dimapur nung YONO Cash tenzüktsüdang tangokba noksa nung angur.

Dimapur, Metsüremi/March 15 (TYO): Sen agizükba services temelaba kümja tanü Dimapur nung State Bank of India (SBI)-i service tasen ka- “Yono Cash” tenzüktsüogo, koba ajanga customer temi debit card mesüra credit cards mashie ATMs nungi sen agizüktettsü, ta ketdangsertem osang ka ajanga metetdaktsü.
Iba service tenzüktsüba sentong nung jembidang AGM, SBI, Regional Business Office, Dimapur, Paogin Haokip-i, “YONO ya million 18 dak tema download süogo aser iba service amshir million 7 dak tema lir. Joko SBI customer kati linük nung aliba SBI ATMs 16,500 nung card mamshie sen agizüktettsü,” ta metetdaktsü.
Paisa, “Item ATMs dang YONO Cash Point ta ajatsü. SBI-i maneni YONO nung features aika inoksemtsü, koba ajanga customer tem ajangzüktsü,” ta shisem.
SBI customer kati YONO app ajanga sen agizükba inyakyim inyakatettsü aser YONO Cash pin number trok ajena sen agizüktettsü. Parnoki registered mobile number nung SMS ka angutsü, king sen agizüktsü atema number/digit trok agutsütsü.
PIN aser SMS ajanga anguba reference number ajanga anasatiba YONO cash point nung minute 30 mesüidangsa senji agizüktsüla.
YONO app ya Android aser iOS powered mobile phones nungi agizüktettsü.