SBI-i Wheel Chairs & Stretcher trolleys tenla agütsü

Dimapur, June 18 (TYO) : Corporate Social Responsibility (CSR) nung shilem ka ama State Bank of India (SBI)-i mozüki aser community health centres nem wheel chairs 50 aser stretcher trolleys 50 agütsüogo.
SBI Regional office Dimapur kübok aliba mozükitem aser community health centres nem agütsü aser ibaji district pungu atema asütsü.
SBI-i mapa tajung inyakba atema Dimapur Deputy Commissioner, Kesonyu Yhome, IAS-i tenüngsang agütsü aser paisa ashiba agi, health sector nung public investment kanga ajema lir aser iba ya asoshi sector ajaki yariteptsüla.
Honibarbü SBI Regional Office, Naga Shopping Arcade, Dimapur nung sentong agidang Kesonyu Yhome-i teyari angur nem kulikakettem lema agütsü.
Dimapur, Peren, Phek, Kiphire, Kohima aser Tseminyu nungi Doctor aser Hospital ketdangsertem aika iba sentong nung aden.
Kasa sentong nung shilem ka ama SBI Regional Office Mokokchung-ia district 6 nung health centre balala nem wheel chairs 50 aser stretcher trolleys 50 lema agütsüogo.
Parnokisa ambulance, school tem nem water filter amala tenla agütsüogo aser Hornbill Festival, Dimapur Night Carnival aser Care & Support Society, Mokokchung sentongtem nung teyari agütsüogo.