SC atema Dec 15 dak tema anogo matsünglangtsü

New Delhi, November 03 (Agencies): Tanü Union Urban Development Ministry-i, Urban local tentet aser state temi city level Smart City Plans Centre nem agütsütsü atema December 15, 2015 nü dak tema anogo matsülangshitsütsü, ta metetdaktsüogo.
State Urban Development department nungi Principal Secretary tem aser state teku nung aliba yimti kar nungi Municipal Commissioner tem den senden amenba mapang ministry-i iba osangji metetdakja liasü.
Tanü iba senden nung UP, MP, West Bengal, Odisha, Andhra Pradesh, Tamil Nadu, Karnataka, Maharashtra aser Nagaland nungi ketdangsertem dena liasü.
Senden nung Municipal Commissioner kari, Ministry-i lateta yutsüba anogo, December 15 nü tashi nung Smart City Plans agütsütsü atema parnoki kanga meranga inyakdar ta metetdaktsüba den külemi anogo atsülangshitsü temepishiba dang lira ano anogo atsülangshitsü asü ta asüngdanga liasü.
Urban Development Minister, M Venkaiah Naidu-i jembiba nung ajemdaker ministry ketdangser kari, December 15 nü dak tema anogo matsülangtsü, anungji mission city ajaki lateta aliba anogo tashi nung smart city plans agütsüseptsüla, ta ashi.
Iba senden ya state tem nungi ketdangsertem den smart cities atema smart city plans onük nung shisa lemsateptsü aser iba nung sensotem nem shilem agidaktsütsü atema ministry-i ayongzükba senden ka liasü.
Tang tashi nung state aser Union Territory ajak nungi Smart City Mission nung yimti 98 shima lir. Iba mapatong ya taküm June ita nung Ato kilonser Narendra Modi-i tenzükja liasü.
Smart City Plans renemtsü atema tamalen Union Urban Development Ministry-i mission city shia nem sen crore ana agütsüogo.