SC-i Arrla 370 ken o angadang tenzükogo

New Delhi, December 11 (Agencies): Supreme Court nungi judge pongui akümba Constitution bench kati Centre sorkari Jammu & Kashmir nung Arrla 370 agienba aser UT ana küma lemsatsüba anema benokba ken o angadang tenzükogo.
Ken o angadangba mapang nung bureaucrat nungi activist akümsang, Shah Faesal den tangartem tenüng nung jembitsüdang senior advocate, Raju Ramachandran-i Justices N V Ramana, S K Kaul, R Subhash Reddy, B R Gavai aser Surya Kant nungeri akümba bench dang, “Arrla 370 agienba mapang nung inyakyim shidak meinyak, kechiyong state-i benokba nung ajemdaker ang Arrla 370 agientsü akok,” ta ashi. Paisa, Centre sorkari President’s rule nung jenoker iba Arrla agien, state aser Centre na tsüngda tesendaktep nung khenpiga atema tashi amshitsü makok, ta ashi.
Paisa, iba telemtetba agitsü atema Jammu & Kashmir nüburtem o mangadang saka Centre-i dang aritepa telemtetba agi, ta metetdaktsü.
Advocate-i, Arrla 370(I)(d) kübok Tiri J&K sorkar indang tashi menüngdaker, anungji iba tashiji Angh-ia mamshitettsü, pa ya President’s Rule kübok Tir atema delegate ka dang lir, ta ashi.
Ken o angadangba tetenzüklen court dang, item temepishiba ken otemji bench tuluba ka nem agütsütsüla, kechiyong tamalen judge pongui akümba bench anati agütsüba obendangji balala, ta ashi.
Iba dak sendakba nung court-i, tamalen agütsüba obendangji parnoki meteta lir, anungji tesülenbo bench tuluba ka nem agütsütsüa akok, ta metetdaktsü.