SC-i Ayodhya ken o tanü tatembangsa angatsü

New Delhi, October 15 (Agencies): Supreme Court-i Bodbarnü Ram Janmbhoomi-Babri Masjid indang ken o angadangba tembangtsü akok.
Chief Justice of India Ranjan Gogoi-i aniba Constitution Bench kati taoba mapang October 17 tashi nung Ayodhya ali ashishitep ken o atema o toktepba tembangtsü mapang latetja liasü.
Iba anogo tonga aruba agi Ayodhya administration-i December 10 tashi ashishitep aketba temeket nung Section 144 alitsü ozüng agütsüogo.
Iba tenokdangba kübok temelaba melii unmanned aerial vehicles mamshitsü, district nung boating masütsü aser firecrackers mayoktsüba dena lir.
Ayodhya ken o atema SC indang Constitution Bench nung CJI den külemi Justice S A Bobde, Justice D Y Chandrachud, Justice Ashok Bhushan aser Justice S Abdul Nazeer nungertem züngsema lir.
September 30, 2010 nü Allahabad High Court-i oshidang agütsüba anema temepishiba ken o benokbatem iba Constitution Bench-i angadanga arur.
Allahabad High Court-i ashishitep adokba ali acre 2.77 ji Nirmohi Akhara, Sunni Central Wakf Board, UP aser Ramlalla Virajman teloktem nem kasasa lemdangtsü. Iba nung December 6, 1992 tashi Babri Masjid noktaka aliba kimung aser iba temeket dena lir.