SC-i Centre dang Rohingya camps indang osang tejangja meshir

New Delhi, Metsüremi 19 (Agencies): Tanü Supreme Court (SC)-i Centre sorkar dang linük kübok state balala nung Rohingya refugee camps indang osang tejangja agüjang, ta metetdaktsü.
Senior advocate, Colin Gonsalves-i, Ronghingya nunger camp ji kangasa memerük aser temang nung timtem adoktsüsa lir, ta Chief Justice Dipak Misra aser Justices A M Khanwilkar den D Y Chandrachud nungeri akumba bench nem metetdaktsü.
Temepishiba benoksang, Zaffar Ullah atema jembitsür senior lawyer-i, Centre den Haryana, Rajasthan aser Jammu & Kashmir state tem dang item camp nung hygienic facilities agutsütsüla, ta ashi.
Temepishiba shidi nungji, item camps memerükba ajanga tawa nisung aika süogo, ta shia lir.
Yaküm Myanmar kübok western Rakhine state nung rara adokba sülen Ronhingya nunger aika India-i jena arua Jammu, Hyderabad, Haryana, Uttar Pradesh, Delhi-NCR aser Rajasthan state tem nung jenoka lidar.
Linük arrtsülen Rohingya refugees meindokba anentsü aser India linük nung aliba refugees camp balala jenjang tajungba kümtsütsü atema temepishiba shidi ka nung ajemdaker telangzüba agutsütsü atema tan ita tetenzüklen SC-i Centre nem mapang agüja liasü.
SC bench-i telangzüba agutsütsü atema Centre nem Metsüremi (March) 16, 2018 tashi mapang aguja liasü.