SC-i Centre dang Rohingya refugees camps dak sendakba osang meshir

New Delhi, Rongchii/April 09 (Agencies): Tanü Supreme Court SC-i Centre sorkar dang Delhi aser Haryana na nung aliba Rohingya camp asem nem nüngdakbatem agutsüba osang agüjang, ta metetdaktsü.
Chief Justice Dipak Misra-i aniba bench-i Centre sorkar dang Mewat, Faridabad aser Delhi nung aliba Rohingya camps indang osangji hopta pezü tsüngda agüjang, ta tuyu.
Iba bench nung züngsem anaji justices- A M Khanwilkar aser D Y Chandrachud na lir, aser parnoki iba ken o maneni May 9, 2018 nü angadangtsü.
India nung jenoka aliba Rohingya refugee temi, parnok nem mestümeshidak aser tajemtzü tzü densema nüngdakbatem magutsür, aser ibaji ajanga camp nung jenoka alir tanur-tain ajak tebok oa shiranger, ta metetdakja liasü.
Metsüremi 29, 2018 nü Supreme Court-i, Rohingya refugees camp nung health service aser shisaliok agutsütsü dak sendakba nung parnoki interim order magutsütsü, ta metetdakja liasü.
Refugees- Mohammad Salimullah aser Mohammad Shaqir nati temepishiba shidi ka ajanga Supreme Court dang, Tamil Nadu nung Sri Lankan Tamil refugees nem shisaliok aser health service agutsüba ama India nung aliba refugees nema kasa maongka agutsütsü mepishia liasü.
Myanmar kübok Western Rakhine state nung rara adokba sülen Rohingya refugee tem Jammu, Hyderabad, Haryana, Uttar Pradesh, Delhi-NCR aser Rajasthan nung jenoka lir.