SC-i Centre dang states nem MNREGA agütsütsü tuyuogo

New Delhi, May 13 (Agencies): Hokolbarnü Supreme Court (SC)-i Centre sorkar dang state tem nem MNREGA scheme kübok tagütsütsü aliba senotsü ajak agüjang, ta tuyuba den külemi tzünglu maruba ajanga timtem ajangshia aliba aluyimertem nem magütsüi aliba taa agüjang, ta tuyu.
“Senotsü agi anüngba ajanga, ta shia sorkari atsüktsü makok,” ta SC-i ashi.
Justices M B Lokur aser N V Ramana nati akumba bench-i, National Food Security Act junga benoktsü aser tzünglu maruba ajanga timtemba state tem nung public distribution system junga benoka inyaktsü atema commissioner tem shimang, ta tuyu.
Bench-isa sorkar dang, lateta aliba ama Central Employment Guarantee Council tentetang aser item tesem nung aonsotsü nung takoksa anguba atema senotsü teyari agüjang, ta tuyu.
SC-i, state temi Parliament-i lateta aliba ama meinyaktsü ta ashitsü makok, ozüng ajanga state densema ajak alener, ta metetdaktsü.
Linük nung nütsüng shilem pezüsü nungi shilem kabo tzünglu maruba timtem ajanga kongshia aliba dak sentakba nung SC-i Centre sorkar dang ita asem tsüngda National Disaster Mitigation Fund tenzükang ta tuyu.
Supreme Court-i tetuyuba aika agütsüba rongnungsa court-i Centre dang ita trok tsüngda National Disaster Response Force ka tenzükang, ta tuyuba densema lir.
SC-i Agricluture Ministry Secretary dang, tzünglu maruba tensa asadangtsü aser osang tejangja bendentsü atema hopta ka tsüngda Bihar, Gujarat aser Haryana Chief secretary tem senden ka ayongzüka menang, ta tuyu.
Ajisüaka SC-i, NGO, Swaraj Abhiyan-i benokba onüktemji tzünglu maruba dak sentakba onüktem süaka item onükjibo tanga tetuyuba ajanga inyaktsü, ta ashi.
Temepishiba shidi ka ajanga melungtet telok, Swaraj Abhiyan-i, Uttar Pradesh, Karnataka, Madhya Pradesh, Andhra Pradesh, Telangana, Maharashtra, Gujarat, Odisha, Jharkhand, Bihar, Haryana aser Chattisgarh state tem tzünglu maruba ajanga kongshia lir saka ketdangsertemi tim teyari magütsür, ta benoka lir.