SC-i Centre sorkar dang J&K dak sendakba telangzüba meshir

New Delhi, September 30 (Agencies): Centre sorkar dang Jammu & Kashmir nung hospitals aser medical establishments ajak nung high-speed internet services aser landline phone services agüjang, ta temepishiba ka benokba dak sendakba nung Hombarnü Supreme Court-i Centre dang nungi telangzüba meshiogo.
Chief Justice Ranjan Gogoi-i aniba bench-i Centre nem notice ka agütsü aser Kashmir onük dak sendakba onüktem nung temepishiba benoka alibatem metetdaktsü.
September 11, 2019 nü advocate, Satya Mitra-i doctor Sameer Kaul aser Salim Jahangeer Kirmani na tenüng nung Supreme Court nem temepishiba ka agüja liasü.
Kasa temepishiba ajanga central sorkar dang tarutsü nungbo hospitals aser medical establishments nung internet aser landline phone services menokdangtsü mepishia lir.
August 5 nü J&K nung Arrla 370 agienba sülen state nung communications ajak nokdanga liasü, aser iba dak sendakba nung August 13, 2019 nü Kashmir Times executive editor, Anuradha Bhasin-i state nung communications nokdanga aliba agienang ta temepishiba ka agüja liasü.
Bhasin-i ashiba agi, communications services nokdangba ajanga Kashmir Times osangkaket madoker aser iba ya linük temzüng kübok osangbenertem temeden agienba lir.
Supreme Court-isa constitution bench nem tanurtem temeden mongin, Enakshi Ganguly aser Professor Shanta Sinha nati Jammu and Kashmir nung ozüng alema tanurtem pudena ayuba anema benokba PIL ka agütsü.
Mongolbar nungi tenzüka court-i Arrla 370 dak sendakba temepishiba ken otem angadangtsü.
August 5 nü Centre-i linük temzüng nung Arrla 370 aser 35A agienba den Parliament nung Jammu and Kashmir (Reorganisation) Act, 2019 agizük, koba ajanga J&K state ya Union territory ana küma lemdanger.