SC-i Chidambaram temepishiba ken o Hombarnü angadangtsü

New Delhi, August 23 (Agencies): INX Media ken o dak sendakba nung Hokolbarnü Supreme Court-i Congress lenir aser taoba mapang Union Finance Minister, P Chidambaram August 26 nü tashi maputsü oshidang agütsüogo.
Ajisüaka Chidambaram CBI ket nungsa ayutsü, kechiyong Supreme Court-i CBI ken o nungji tiyongtsüi mair.
Justices- R Banumathi aser A S Bopanna nati akümba bench-i Hombarnü, August 26 Chidambaram-i mepishiba ken o angadangtsü lemtet.
CBI-i Prevention of Corruption Act and Indian Penal code nung ajemdaker pa anema ken o benok aser ED-i Prevention of Money Laundering Act nung ajemdaker pa anema ken o benoka lir.
SC bench-i tanü ken o angadangba mapang Chidambaram atema jembitsür senior advocate Kapil Sibal-i, Arrla 321 kübok fundamental temeden anema inyakogo, kechiyong Bodhbarnü anticipatory bail benoka liasü saka iba aonungjisa CBI-i Chidambaram apu, ta ashi.
CBI aser ED atema jembitsür Solicitor General Tushar Mehta-ibo, Chidambaram ya tang pua lir, anungji anticipatory bail atema mepishibaji menüngdak, ta ashi.
SC-i Chidambaram maputsü atema oshidang agütsüba anema SG Mehta-i, CBI ket nung yur Chidambaram dang asüngdangyatsü nüngdaker, kechiyong pai pa dak aliba tesangra shisatsü, legal aser yimtenren shisatsü amshia tasüngdangbatem paidoker, ta ashi.
“Pa nem bail agütsüra onoki junga bushisüngdang mesütettsü. Ibayongji onok ket nung yur asüngdangyatsü nüngdaker. Ozüng alema sen transfer asüba electronic kuli, emails yokba kuli onok ket nung lir. P Chidambaram den tesendaktep junga alirtemi Shell companies tentet,” ta Mehta-isa ashi.
August 21 aonung CBI-i Chidambaram apuba sülen tasüngnep pa Delhi court kati anir oa court-i Chidambaram August 26 nü tashi CBI ket nung ayutsü atema temelaba agütsü.