SC-i Delhi nung diesel garitem registration tasen nokdanger

December 16, 2015 nü tangokba noksa nung New Delhi nung aliba lenmang ka nung gari sadema mesenzüteti anena aliba angur. New Delhi-i mopung menenba anema raraba mapang ka nung India nung court temaba, Supreme Court-i New Delhi nung diesel gari tulu registration mapang tatsüka atema nokdangogo aser linük yimtiba Delhi telungi aitba truck ajak dang nungi saru aika agitsü tuyuogo.

 New Delhi, December 16 (Agencies): Delhi nung mopung kanga tamajung nokdangba maparen dak sentakba nung Bodhbar nü Supreme Court (SC)-i Delhi aser telungtet, National Capital Region nung sangküm March 31 nü tashi diesel SUVs aser 2000cc gol aketba jenjang tasak garitem registration tasen nokdangogo.

SC-isa Delhi-i maruba truck tem National Highways 1 aser national highways 8 lenmang ajanga mesenzüdaktsütsü tuyuogo. Ano Delhi atema osettsüset belenba truck tem dang nungi Environment compensation charge (ECC) sen 2,600 agitsü aser shishilembaba gari tilatem dang nungi sen 1,400 agitsü. Iba ya tamalen agia aliba dang nungi anasü agi timba lir.

Supreme Court-isa yimti nung senzüba nija taxi ajak dang sangküm March mezüng nü tashi nung Compressed Natural Gas (CNG) agi melentsü tuyuogo. Iba tetuyuba nung diesel gari tila amshirtembo madener.

Delhi sorkari January 1 nü nungi odd number garitem aser even number garitem anogo balala nung senzütsü benoka aliba mapang ka nung SC-ia iba tetuyuba agütsüogo.

SC-isa Centre sorkar dang yimti nung traffic police ajak nem tejak semoktsü (mask) tajung agüjang, ta shiogo.

Delhi lenmangtem nung gari shilem 23 bo diesel garitem lir, koba ajanga petrol gari dang nungi carcinogenic nitrogen oxide aiben agi timba adokdaktsür.

Anogoshia Delhi nung gari tasen 1,400 dak tema bendenloker. Tang Delhi lenmangtem nung gari million 8.5 lir.