SC-i doctor tem kümzüktsü indang PIL agizük

New Delhi, June 17 (Agencies): Sorkar mozü kitem nung security lemzüktsütsü indang Public Interest Litigation (PIL) ka Supreme Court-i angadangtsü agizükogo.
Mapang shia doctor tem dak teka sangshiba atema iba PIL benok.
Justice Deepak Gupta aser Justice Surya Kant na adenba Vacation Bench kati iba onük Mongulbarnü angadangtsü.
Iba PIL nung SC-i Centre aser West Bengal sorkartem nem tetuyuba agütsütsü aser linük nung sorkar meyong mozü kitem nung security agütsütsü indang shia lir.
Kolkata nung aliba NRS Hospital nung junior doctor ka dak teka sangshiba anema West Bengal nung doctor temi lungkak aittsü tenzük. June 14 nü linük ajungalen doctor temi West Bengal nung doctor tem posemba sayua mapa meinyaki lungkak aita liasü.
SC nung PIL ji advocate Alok Srivastava-i benokba lir aser pai Indian Medical Association (IMA)-i bushitetba osang ka shisema lir.
Linük nung aliba doctor 75% shi kati ozüng alema inyaksangshiba tensa ajuruogo, ta IMA-i bushiteta lir.
Item tatalokba 50% ji mozü ki indang Intensive Care Unit (ICU) nung atalok aser tatalokba 70% nung shiranger kinungertem dena liasü, ta IMA-i bushitetba osang metetdaktsü.
Srivastava-i Constitution nung Arrla 32 kübok iba PIL benok.
India nung sorkar mozü ki ajak nung doctor tem kümzüka ayutsü atema uniformed security personnel shima mapa nungloktsütsüla. West Bengal nung doctor dak teka sangshirtem ozüng tesashi agi merenshitsüla, ta PIL nungsa takhangba agüja lir.