SC-i Kathua ken o Pathankot Court-i belenogo

New Delhi, Monupii (May) 7 (Agencies): Tentonü (Hombar) Supreme Court-i Kathua ken o Pathankot Court-i belenogo aser anogo shia iba ken o angatsü tetuyuba agütsü.
Tanutsüla tebui Supreme Court dang iba ken o belentsü atema temepishiba agütsüba sülen Chief Justice of India Dipak Misra-i aniba bench kati temelaba agütsü.
Par kibong, medemer ka aser lawyer Deepika Singh Rajawat nungertem amokmerener ta tetsürla tebui agütsüba shidi nung shia lir.
Iba ken o angadangba nung tim masüba kar danga adokra tanga okadak kati belentsü ta taoba mapang Supreme Court-i osang metetdakja liasü.
SC-isa J&K sorkar dang Pathankot Court nung public prosecutor ka shimtsü aser J&K sorkari tetsürlar kibong, lawyer aser kuli agütsürtem nem security agütsütsü atema tetuyuba agütsü.
Aenjeti (January) 10, 2018 nü Kathua anasa arishi küm8 tain tetsür tanur ka sama aser hopta ka shi lir la indang tasümang angu.
Taoba mapang iba ken o angadangdang tanutsüla atema noktaker senior advocate Indira Jaising aser tai tonglokja alirtem atema noktaker advocate Harvinder Chaudhary na tsüngda o kanga atsütepa liasü.
Advocate General Jahangir Iqbal Ganai aser Jammu & Kashmir atema counsel Shoeb Alam nati iba ken o nung CBI nem bushisüngdang südaktsütsü atema magizük. Tenati ashiba agi crime branch nungi SIT-i iba ken o bushisüngdang südar.
Kathua aser Jammu nungi iba ken o tanga state nung district kati belentsü akok kechiyong kuli agütsür nisung 221 lir aser parnoki Urdu oshi nung teimba agüja lir ta Ganai-i ashi.
Jammu & Kahsmir CM Mehbooba Mufti-ia tanü Twitter nung Supreme Court telemtetba pela agizükba metetdaktsü.
“Tanü Supreme Court-i lemtetba pelashishia agizüker. Iba ajanga J&K Police force ajungkettsü kechiyong parnoki tetsükdaktsü aika ajuruaka, tasür kibong nem temeten agütsütsü atema mapa tulu inyakogo” ta Mehbooba-i ashi.
Ano külen Punjab Chief Minister Capt Amarinder Singh-ia ken o Pathankot-i belenba atema “Tongtipangbaji security lir, Pathankot nung security peria lir” ta osang metetdaktsü.