SC-i MLA/MP tem ken o akatsü atema scheme renemtsü tuyu

New Delhi, November 01 (Agencies): Bodhbarnü Supreme Court-i Centre sorkar dang MP tem aser MLA tem anema ken o benoka aliba tekaraba nung akatsü atema ‘special courts’ amenoktsü asoshi scheme ka renemang, ta tuyuogo.
SC-isa sorkar dang, item ama court amenoktsü atema sen kwi lemzüktsütsüar ibaji metetdakjang, ta tuyu.
Item ama courts ji fast-track courts den mesüktepa asütsü, aser iba nungji yimtenren lenirtem anema ken o benoka tekaraba nung ken o angadanga obendang agutsütsü.
Keno nung aibelener yimtenren lenirtem taküm piyong yimtenren nung shilem magidaktsütsü atema benokba aliba temepishiba ken o dak sendakba nung Centre-i memelungi, ibajibo reprangshitsü nüngdaker, ta ashi.
Supreme Court-isa Centre sorkar dang, 2014 küm osang nung ajemdaker MP aser MLA tem anema ken o 1,581 benoka aliba obendang agütsüogo, anungji item ken o nungjagi kwika aitsü, aser kwi aibelen mengutet, iba osangji metetdakjang ta tuyu.
Supreme Court-isa Centre dang 2014 nungi 2017 küm tashi nung yimtenren lenirtem anema ken o kwi benoka lir, ta asüngdang.
Tanü Election Commission (EC)-i Supreme Court dang, ozüng alema aibelenba ken o nung aija alir MP tem aser MLA tem jibo taküm piyong election nung shilem magidaktsütsüla, ibaji ajanga yimtenren nung ozüng alema inyakba nokdangtsü, ta metetdakja liasü.
Yimtenren lenirtem aika anema ken o benoka aliba onük nung Election Commission-i kechiba ola madoker, ta SC-i asüngdangba dak sendakba nung tanü Election Commission-i iba ya metetdaktsü.
Ano külen BJP lenir, Ashwani Upadhyay-ia, ozüng alema aibelener MP tem aser MLA tem taküm piyong election nung shilem magidaktsütsüla ta temepishiba ken o ka benoka lir.
Tang aliba ozüng kübok- ozüng alema aibelenba ken o nung aitsür yimtenren lenirtemji küm 6 tashi election nung shilem magidaktsür.