SC-i obendang agüjaka Ram tekülem ki yanglutsü: BJP lenir

New Delhi, December 08 (Agencies): Hokolbarnü BJP lenir, Tapan Bhowmik-i, Ayodhya mangatettep ken o nung Supreme Court-i Hindu nunger metenja obendang agütsütsü imlar, yamaji mesüaka Ram tekülem ki yanglutsü atema BJP lenirtemi inyaktsü, ta ashi.
Tapan-i, “Hindu nunger metenja obendang agütsütsü. Yamaji masü nunga onoki odangbo metoktsütsü. Ram tekülem ki yanglutsü atema Hindu nunger crore aikati inyaktsü,” ta metetdaktsü.
Paisa, “Lok Sabha nung BJP züngsemtemi Ayodhya nung kasa tesem nung Ram tekülem ki yanglutsü atema inyaktsü. Iba obendang agütsüba sülen Lok Sabha nung ozü züngsemtemi ozüng yanglutsü, aser kasa tesem nung tekülem ki yanglutsü atema Bill ka agizüktsü,” ta ashi.
Ayodhya ken o nung 2010 küm September ita nung Allahabad High Court-i obendang agütsüba anema temepishiba benoka aliba ken otem SC-i angadangdar.
Kasa ken o ya sangküm February 8 nü angadangtsü, ta Chief Justice Dipak Misra, Justice Ashok Bhushan aser Justice S Abdul Nazeer nungeri akumba bench-i metetdaktsüogo.