SC-i open court nung Rafale anema benokba ken o angadangtsü

New Delhi, February 26 (Agencies): Rafale jet ken o nung yaküm December ita nung Supreme Court-i agutsüba obendang tanaben reprangshitsü atema temepishibatem benoka liasü, aser tanü Supreme Court-i iba obendangji o open court nung repangshia angadangtsü atema melungogo.
India aser France na tsüngda India-i Rafale fighter jets 36 alizükba tezüngzüktep nung ochimashi lir, ta tai tongloktsüba ken o nung yaküm December ita nung Supreme Court-i, rafale alitsü atema jembiba inyakyim nung aibelen kuli mangur, ta obendang aguja liasü.
Tanü Chief Justice Ranjan Gogoi den Justices- S K Kaul aser K M Joseph nunger züngsemba bench-i taoba mapang Union ministers- Yashwant Sinha aser Arun Shourie na den activist lawyer, Prashant Bhushan nungeri iba obendang open court ka nung reprangshitsü atema benokba temepishiba agizük.
“Rafale ken o reprangshitsü temepishiba agizükogo,” ta bench-i metetdaktsü.
Taküm January 2 nü Rafale fighter jet deal dak sendakaba nung Yashwant Sinha, Arun Shourie aser Prashant Bhushan nungeri Supreme Court dang December 14 nü parnoki agutsüba obendang meyipa repangshitsü mepishia liasü.
Parnoki iba ken o meyipa reprangshitsü aser iba ken oji open court ka nung angadangtsü atema SC dang mepishi.