SC-i SBI dang electoral bonds osang tejangja sangdongtsü tuyur

New Delhi, March 15 (Agencies): State Bank of India (SBI)-i electoral bonds scheme osang tejangja mesangdongba atema Supreme Court-i aitsüogo.

Supreme Court-i SBI dang osang tejangja sangdongang, talisa tenla agütsür aser yimtenren party na tsüngda tesendaktep sangdongang, ta tuyu.

Electoral bond scheme ya ajanga tenüng memetetdaktsüi yimtenren party tem nem tenla agütsütsü atema nija aser businesses dang melaa liasü, ajisüaka iba maparen teladak süa meinyakba atema ashishir. Taoba ita SC-i iba scheme anentsüogo.

Election Commission-i temepishiba shidi ka agütsüba nung ajemdaker Supreme Court-i SBI dang electoral bond osang dang masü saka electoral bond numbers-a sangdongang, ta tuyu.

Chief Justice DY Chandrachud-i aniba bench-i electoral bonds dak sendakba osang ajak sangdongtsüji kanga tongtibang, ta metetdaktsü.

Electoral bonds alizükba anogo, alizüker tenüng aser denomination sangdongogo, ajisüaka Supreme Court-i SBI dang kechiba electoral bonds (unique alphanumeric numbers) mesangdong?, ta asüngdang.

Supreme Court bench-i SBI dang, nenoki züngdokbaji (numbers) metongshiang aser tesüiba küm pongu tsüngda electoral bond transactions indang osang tejangja agüjang, ta tuyu.

Iba ken o angadangba mapang Chief Justice Chandrachud, “Shibai State Bank of India atema jembitsür? Parnoki bond numbers magütsü. State Bank of India-i ibaji sangdongtsüla,” ta ashi.

Iba dak sendakba nung March 18 nü kasa ken o angadangba mapang nung ibaji asüngdangtsü atema court-i SBI jaokogo.

SBI indang affidavit ajanga ashiba agi, April 1, 2019 nungi February 15, 2024 anogo tashi nung bonds 22,217 alizüka liasü.

Tamalen SBI-i electoral bonds osang sangdongtsü atema Supreme Court dang June 30 tashi mapang meshisema liasü saka SC-i temepishibaji magizüki March 12 tashi nungbo electoral bond osangji Election Commission nem agüjang, ta tuyua liasü.